Xulka Kubadda Cagta Burundi Oo Ka Badiyey Dhigiisa Soomaaliya * Mareeg.com somalia, World News and Opinion.
Mareeg Media
Somalia

Xulka Kubadda Cagta Burundi Oo Ka Badiyey Dhigiisa Soomaaliya

Niarobi, Mareeg.com: Xulka qaranka Burundi ayaa galabta 2-0 kaga badiyay xulka Soomaaliya kulan ka tirsanaa tartanka xulalka bariga iyo bartamaha Africa oo ka dhacay magaalada Machakos ee dalka Kenya.

Labada xul ayaa ka wada tirsan qeybta B waxaana ku wehliya xulalka Tanzania iyo Zambia.

Ciyaarta oo ka dhacday magaalada Machakos oo 64 Km u jirta Nairobi, ayaa sababtay in aysan ka qeyb-gelin soomaali fara badan, balse waxaa soo xaadiray garoonka boqollaal Soomaali ah.

Qeybta hore ee ciyaarta ayaa ku billaabatay si deggan, iyadoo ciyaartoyda xulka Soomaaliya ay muujiyeen dedaal hadana uma suurta-gelin inay gool dhaliyaan.

Gool-hayaha xulka Soomaaliya Maxamed Shariif oo ka yimid dalka Holland, ayaa dhowr fursadood bad-baadiyay ka hor inta aysan Burundi helin goolkooda koowaad daqiiqadii 42-aad.

Goolka ayaa ku dhashay qalad ay sameeyeen daafacyada xulka Soomaaliya kaas oo ay ka faa’iideysteen Burundi.

Qeybta labaad ee ciyaarta ayaa badankeed lagu ciyaarayay iyadoo roob xooggan uu ka da’ayay garoonka taas oo saameyn ku yeelatay ciyaartoyda Soomaalida oo aanan u baran inay roob ku ciyaaraan.

Goolka labaad ayay Burundi heshay 10 daqiiqo kadib billaabashada qeybta dambe ee ciyaarta kadib markii kubbad laga soo tuuray meel ka baxsan xerada ganaaxa uu bad-baadin kari waayay gool-haye Maxamed Shariif.

Qeybta dambe ee ciyaarta ayay kooxda Soomaalida iska lumiyeen fursado gool ay ku dhalin kareen, iyadoo si wanaagsan ay u ciyaareen qeybta dambe inkastoo roob uu da’ayay.
Guud ahaan ciyaarta ayaa ku dhammaatay 2-0 oo ay guusha ku raacday xulka Burundi.

Macallinka xulka Qaranka Soomaaliya, Maxamed Cabdulle Fara-Yare oo warbaahinta la hadlay ciyaarta kadib, ayaa sheegay in ciyaartoydiisa ay si wanaagsan u ciyaareen balse ay saameyn ku yeelatay cimilada magaalada lagu ciyaarayay.

Wuxuu xusay in ay rajo wanaagsan ka qabaan kulamada kale ee la ciyaari doonaan Tanzania iyo Zambia.

Danjiraha Soomaaliya u fadhiya Kenya, Maxamed Cali Nuur Ameeriko, qaar ka tirsan ciyaartoydii hore ee qaranka iyo masuuliyiinta xiriirka kubadda cagta Soomaaliya ayaa ka mid ahaa dadkii garoonka ku sugnaa ee ciyaarta daawanayay.

Kulanka labaad ayay Soomaaliya la ciyaari doontaa Tanzania Axadda soo socoto, halka kulanka ugu dambeeya ee qeybta B la yeelan doonto Zambia 4-ta December. Labada kulan ayaa qorsheysan in lagu ciyaaro Nairobi.

Xulalka Tanzania iyo Zambia oo iyaguna galabta ciyaaray ayaa ku kala tagay 1-1.

Ciyaartoydii u safneyd xulka qaranka Soomaaliya:
Qaab Ciyaareedka 4-4-2
Goolhaye:
1 Maxamed Shariif (Koox ka dhisan Holland).

Difaac: 2 Mahad Maxamed Xaaji (Heegan), 6: Kabtan Xasan Cali Rooble Babaay (Elman), 13: Aadan Xuseen Ibraahim (Sahafi FC), 5: Xasan Xuseen Maxamed (Elman).
Dhexda: 5: Daa’uud C/llaahi Xasan (Jeenyo), 8: Deeq C/qaadir Nuur (Heegan), 11: Maxamed Saalax Xuseen (Elman) iyo 19: Caadil Nuur (Banaadir SC).
Weerar: 14: Jabriil Xasan Fariid (Heegan) iyo Saadaq Cabdulqaadir Maxamuud (AFC Leopards).

Beddel: 18: Siidii Maxamed Cumar (Heegan) iyo 15: Maxamed Cabdi Xaayow (Heegan).

W/D: Ibrahim Gedow Awale (Pipo), Nairobi_Kenya
Injineerka14@gmail.com

Get real time updates directly on you device, subscribe now.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More

Do NOT follow this link or you will be banned from the site!