Xog: Midowga musharixiinta oo saddex qaybood u kala jabay iyo xogo ka soo baxaya * Mareeg.com somalia, World News and Opinion.
Mareeg Media
Somalia

Xog: Midowga musharixiinta oo saddex qaybood u kala jabay iyo xogo ka soo baxaya

Ilo xogagaal ah  una dhuundaloola arrimaha siyaasadda ayaa warbaahinta u xaqiijiyey in musharixiinta madaxweynaha Soomaaliya ee doorashada 2021 ay u kala jabeen saddex kooxood kadib muddo dheer oo ay isku koox ahaayeen.

Kala qaybsanka musharixiinta iyo saddexdaan kooxood ee ay kala noqdeen ayaa waxaa la sheegay inay la xiriirta isugu dhowaanshaha hab qabiil ahaan ah iyo qaar isugu dhawaaday isbaddel doon dhiig cusub ah ama siyaasiin cusub ah.

Xubnaha musharixiinta ah ee kala ah Maxamed Siiriin, Cabdulqaadir Cosoble iyo Dr. Cabdinuur Maxamed ayaa la sheegay in sameysteen isbaheysi cusub kadib kulan ay dorraad ku yeesheen Nairobi. Murashaxa kale ee Dr. Cabdinaasir Cabdulle oo kulankaasi qeyb ka ahaa ayaa la sheegay in uu ka cudurtaaday isbaheysigaas inkastoo uu ku jiro mid kale.

Dhanka kalena, siyaasiyiin ay kamid yihiin musharax madaxweyne Daahir Sheekh Maxamuud Geelle, Dr. Cabdinaasir Cabdulle, Mustaf Sheekh Cali Dhuxulow iyo Cabdikariin Xuseen Guuleed ayaa dhankooda sameestay isbaheysi cusub, halka Sheekh Shariif Sheekh Axmed, Xasan Sheekh Maxamuud iyo Xasan Cali Kheyre ay dhankooda noqdeen isku dhinac.

Wararka aan helnay ayaa tilmaamaya in siyaasiga Cabdiraxmaan Cabdishakuur Warsame uu ka cudur daartay isbaheysi cusub oo laba jeer loo soo bandhigay waxaana la sheegay in uu kaligiis yahay Murashax taagan inkastoo uu ugu dambeyn ku qasbanaan doono in uu isbaheysi sameesto. Sidoo kale Shariif Xasan Sheekh Aadan ayaa ah Murashax kaligiis taagan oo aan isbaheysi qeyb ka aheyn.

Cabdiraxmaan Cabdishakuur ayaa Axaddii noqday musharax kaliya ee si cad uga soo horjeestay go’aanka guddiga uu magacaabay Rooble ay 34 xubnood uga saareen guddiga doorashada, isaga oo dalbaday in dhammaan 67-ka xubnood laga saaro, halka inta badan musharaxiinta ay soo dhoweeyeen ama ka aamuseen.

Get real time updates directly on you device, subscribe now.

Leave A Reply

This website uses cookies to improve your experience. We'll assume you're ok with this, but you can opt-out if you wish. Accept Read More

Mareeg.com somalia, World News and Opinion.