Wasiirrada Soomaaliya Oo Ka Arrinsanaya Qorshaha Sanadka 2014 * Mareeg.com somalia, World News and Opinion.
Mareeg Media
Somalia

Wasiirrada Soomaaliya Oo Ka Arrinsanaya Qorshaha Sanadka 2014

Muqdisho – Mareeg.com: Ra’iisul Wasaaraha Xukuumada Federaalka ee Soomaaliya Cabdiweli Sheekh Axmed Maxamed ayaa maanta furay kulan howleed labo cisho socon doona kaasoo Golaha Wasiirada ee Xukuumada si gaar ah uga wadatashan doonaan howlaha baaxada leh ee horyaala iyo sidii loogu fulin lahaa muhiimadaha ay kala leeyihiin, gaar ahaana qorshaha sanadka 2014-ka.

Cinwaanka kulanka ayaa ahaa “Hannaankii lagu shaqeyn lahaa, laguna gaari lahaa Soomaaliya oo nabad ah, is-aamintay, barwaaqo ah, dawladnimo wanaagna gaartay una adeegta danaha dadweynahaeeda”.

Kulankan oo ka dhacay dhismaha Villa Hargeysa ayaa waxaa ka soo qeybgalay madaxweynaha Jamhuuriyadda Xasan Sheekh Maxamuud, Guddoomiyaha Baarlamaanka Prof. Maxamed Sheekh Cismaan Jawaari iyo kuxigeenkiisa, waxaana kulankan hadalo dardaaran iyo dhiiragelin ah ka jeediyay madaxda dawladda.

Ra’iisul Wasaaraha Xukuumada oo ugu horeyntii madasha ka hadlay ayaa xusay in kulankani uu muhiimad gaar ah u leeyahay howlqabadka xukuumada, wuxuuna xusay inay diirada ku saari doonaan arrimaha ku aadan sugida amniga iyo xasilinta dalka, kobcinta dhaqaalaha, horumarinta adeegyadda daweynaha tuulo, gobol illaa degmo, iyo gaarsiinta dalka ee doorashooyin xor ah.

Sidoo kale, guddoomiyaha Baarlamaanka Prof. Jawaari ayaa kula dardaarmay xubnaha golaha Wasiiradu inay wada shaqeyn dhow la yeeshaan golaha baarlamaanka si loo helo kalsooni dhex marta goleyaasha Fulinta iyo sharcidejinta.

Madaxweynaha Jamhuuriyadda Xasan Sheekh Maxamuud ayaa ka codsaday Golaha Wasiirada inay la yimaadaan howlkarnimo, daacadnimo iyo wada shaqeyn dhexdooda ah. Isaga oo aad ugu dheeraaday howlaha baaxada leh ee hor yaala, gaar ahaana qabyo-tirka Dastuurka, abuurida guddiyada, Federaaleynta, iyo gaarsiinta dalka doorasho ku dhacda codeyn dadweynaha ee sanadka 2016-ka.

Ugu dambeyntiina, Afhayeenka Xukuumada Ridwaan Xaaji Cabdiweli oo warbaahinta la hadlay ayaa u sheegay in kulankan la soo afmeeri doono maalinta berri ah isla markaana uu yahay kulan muhiimad gaar ah u leh xubnaha golaha wasiirada ee cusub, maadaama ay isla qaabeyn doonaan howhalaha baaxada leh ee horyaala iyo sida ay u kala mudan yihiin in loo fuliyo, waxaana si gaar ah goluhu diirada saari doonaan sidii dadweynaha loo gaarsiin lahaa adeegyada aas aasiga ah ee lagama maarmaanka u ah nolosha bani’aadamka, sida caafimaadka, waxbarashada.

Get real time updates directly on you device, subscribe now.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More

Do NOT follow this link or you will be banned from the site!