Wasiir Diini: Dib-u-dhiska Ciidamada Xoogga Dalka ayaan Imaaraadka Carabta kala hadlay * Mareeg.com somalia, World News and Opinion.
Mareeg Media
Somalia

Wasiir Diini: Dib-u-dhiska Ciidamada Xoogga Dalka ayaan Imaaraadka Carabta kala hadlay

Muqdisho: Wasiirka Gaashaandhigga Soomaaliya, C/qaadir Sheekh Cali Diini ayaa xerada tababarka ciidanka ee Xero Agoon waxa uu kulan kula qaatay Safiirka Dowladda Imaaraadka Carabta u fadhiya Soomaaliya Mohamed Cusmaan  oo ay ka wada  hadleen arrimo badan oo ku saabsan xiriirka labada dal iyo sidoo kale tababarrada ay saraakiil ka tirsan dowladda Imaaraadka Carabtu siinayaan Ciidamada Dawladda Soomaaliya.

Wasiirka iyo safiirka ayaa isla soo hadal qaadey sidii Dowladda Imaaraadku ay u xoojin lahayd taageerada ay siineyso Soomaaliya, gaar ahaan dhinaca tababarada ciidamada iyo tayayntooda. Xeradii Hore ee Agoonta Booliska Soomaaliyeed ayaa haataan loo badelayaa xero milateri, waxaana dhismaheeda wada dowladda Imaaraadka Carabta.

C/qaadir Sheekh Cali Diini, Wasiirka Gaashaandhigga ee xukuumadda Soomaaliya ayaa tilmaamay in Danjire Mohamed Cusmaan ay  isla soo qaadeen  sidii loo xoojin lahaa cilaaqaadka saaxiibtinimo ee labada dal, isagoo xusay in dowladda Imaaraadku balan-qaaday sii xoojinta tababarka iyo tayaynta ciidamadda qalabka-sida. Mudane Diini ayaa mahad balaaran u jeediyay Dawladda iyo Shacabka Imaaraadka Carabta sida walaaltinimada leh ee ay mar walba u garab taagan yihiin shacabka Soomaaliyeed.

Wasiir C/qaadir Sheekh Cali Diini oo kulanka ka hadlayey waxa uu yiri: “Waxaan booqannay Xerada Tababarka Ciidamada ee Xero Agoon oo ay saraakiil ka tirsan Dawladda aan walaalaha nahay ee Imaaraadku ku tababaraan ciidan ka tirsan Ciidamada Xoogga Dalka Soomaaliya. Waxaa Xeradan dib u dhisay Dawladda Imaaraadka oo weli gacantana ku haysa, waxana ay ka mid tahay mashaariicda ay fulisay Dawladda Imaaraadka”

“Waxaan wadahadal dheer oo wax ku ool ah la yeelanay Danjiraha Dawladda Imaaraadka u fadhiya Soomaaliya oo aan ka wadahadalnay sidii loo xoojin lahaa xiriirka labada dal iyo sidii loo ballaarin lahaa mashaariicda Imaaraadka ee Soomaaliya, gaar ahaan dib-u-dhiska Ciidamada Xoogga Dalka” ayuu yiri wasiir Diini.

Wasiirka oo sii hadlaya ayaa intaa raaciyey “Tababarada Ciidamadu waa astaan muujinaysa Dib-u-dhiska Ciidamada Qalabka sida, waxaana naga go’an inaan ballaarino tababarada iyo qalabaynta ciidamadeena si ay u gataan waajibaadka qaran ee ay u igman yihiin”

Danjiraha Dowalada Imaaraadka Carabta ee Soomaaliya ayaa dhinaciisa balan qaaday in ay kordhin doonan taageerada Soomaaliya ee dhinacyada dhaqaalaha siyaasadda iyo mashaariicda horumarineed intaba, isagoo carraabka ku adkeeyey in dalkiisu ay ka go’an tahay sii wadida taageerada iyo isgarab-taagga dalka ay walaalaha yihiin ee Soomaaliya.

—DHAMMAAD—

Get real time updates directly on you device, subscribe now.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More

Do NOT follow this link or you will be banned from the site!