Soomaali ka mid ah Daacish oo baaq usoo diray Alshabaab

Mareeg.com: Koox Soomaali ah oo ka tirsan Khalaafada Islaamiga ah ee Suuriya iyo Ciraaq ayaa baaq usoo diray Xarakada Alshabaab, iyagoo ka codsaday iney ku biiraan Khalaafada ama Daacish.

Muuqaal oo lagu baahiyay barraha Internet-ka, ayaa waxaa ka soo muuqday rag Soomaali ah oo ku hadlaya luqada Soomaaliga, oo Shabaabka ugu baaqaya inay ka mid noqdaan Dowladda Khilaafada Islaamiga ah.

Nin magaciisa ku sheegay Abuu Hamza Al-Soomaali oo muuqaalkan ka hadlaya ayaa sheegay iney dunida ka jirto Khilaafo Islaami ah, taa oo u taagan inay xuduudaha xilligaan jira cagta mariso, gaaladana ka qaado Jizyo, sida uu hadalka u dhigay.

Waxaa isna muuqaalka ka soo muuqday nin kale oo Soomaali oo araga la’, iskuna magacaabay Taymuulah Al-Soomaali, kaasoo Shabaabka ku adkeeyay inay Daacish ku soo biiraan.

Ninkaan ayaa AlShabaab uu ku booriyay inay qaataan mid lamid ah go’aankii Ururka Boko Haram ee ku biiray Khalaafada Islaamiga ah.

Fariintan, ayaa noqonaysa tii ugu horeysay oo Soomaali ka mid ah Daacish baaq usoo diraan Alshabaab, iyadoo horay ay u jireen warar sheegaya in Daacish ugu baaqeen Alshabaab iney kusoo biiraan.

About A warsame 9751 Articles
Published by A Warsame .He can be reached by news@mareeg.com or Mobile :+447737886245