RW Cabdiweli: Waan ku faraxsanahay xalka Koonfurta Sudan

Addis Ababa, June 11, 2014 – Ra’iisul Wasaaraha Soomaaliya, Cabdiweli Sheekh Axmed ayaa ka qaybgalay Kulankii 26-aad ee aan Caadiga Ahayn ee Madaxda Urur Goboleedka IGAD oo xalay lagu soo gabagabeeyay magaaladda Addis Ababa ee dalka Ethiopia, iyadoo kulankan looga hadlay xaaladda dalka Koonfurta Suudaan.

Kulankan oo uu shir guddoominayay Ra’iisul Wasaaraha Ethiopia Hailemariam Dessalegn ayaa waxaa ka qayb-galay Madaxweynaha dalka Koonfurta Suudaan, Salva Kiir Mayardit, Ra’iisul Wasaaraha Soomaaliya, Cabdiweli Sheekh Axmed, Madaxweynaha dalka Uganda, Yoweri Kaguta Museveni, Madaxweyne ku-xigeenka Kenya, William Ruto, Madaxweyne Ku-xigeenka 1-aad ee Suudan, Bakri Hassan Saleh, Wasiirka Arrimaha Dibedda ee Jabuuti, Mahmoud Ali Youssouf, wakiillo ka socday IGAD iyo xubno ka yimid Qaramada Midoobay, China, Midawga Yurub, Norway, Ingiriiska iyo Maraykanka.

Gabagabada kulanka ayaa waxaa laga soo saaray Warmurtiyeed ka kooban 18 qodob iyadoo Madaxweynaha Koonfurta Suudaan iyo Madaxweyne Ku-xigeenkiisii hore, ahna hoggaamiyaha mucaaradka, Dr. Reik Machar loogu baaqay hirgalinta heshiiskii ay labada dhinac ku wada gaareen magaaladda Addis Ababa 9-kii May, 2014. Waxaa xilligaas lagu heshiiyay in lagu xalliyo dhibaatooyinka ka taagan dalkaas in la joojiyo colaadaha iyo in laga wada hadlo dhismaha dawlad ku-meel-gaar ah oo laga wada qaybgalo si loo gaaro midnimo qaran.

Sidoo kale waxaa loogu baaqay dhinacyada isku haya Koonfurta Suudaan in ay u oggolaadaan shaqaalaha hay’adaha gargaarka in ay kaalmooyin gaarsiiyaan dadka ku nool goobaha khilaafku ka taagan ee Koonfurta Suudaan.

Ra’iisul Wasaaraha Soomaaliya Mudane Cabdiweli Sheekh Axmed ayaa kulankaasi kadib waxaa uu yiri: “Waxaan ku faraxsanahay inaan magaca Soomaaliya uga qeyb galay Kulanka 26-aad ee IGAD ee looga hadlay arrimaha khilaafka ka taagan Koonfurta Suudaan. Waxaan mar walba diyaar u nahay in aan kala shaqayno Urur Goboleedka IGAD horumarinta wada-hadalladda iyo dib-u-heshiisiinta gobolka”.

“Waxaan ugu baaqayaa Dawladda Koonfurta Suudaan iyo mucaaradkaba in ay ka wada shaqeeyaan sidii ay u fulin lahaayeen arrimaha ay heshiiska ku gaareen ee lagu soo afjarayo colaadaha” ayuu sidoo kale yiri Raysulwasaare C/weli Sheekh.

“Waa arrin muhiim ah in dhammaan dhinacyadu ay ku dadaalaan xal siyaasadeed oo loo wada dhan yahay, waana in ay u oggolaadaan shaqaalaha gargaarka inay gargaarka bani’aadanimo gaarsiiyaan dadka ku nool goobaha ay colaaduhu ka jiraan” ayuu sidoo kale yiri C/weli Sheekh.

“Waxaan u rajaynaynaa walaaleheenna Koonfurta Suudaan in ay ku guulaystaan wada-hadallada, annaguna waxaan markasta taageersannahay dadaallada lagu xalinnayo kihlaafka” ayuu hadlkiisa kusoo gebagebeeyey R/wasaare C/weli.

Shirka ka dhacay caasimadda Itoobiya ayaa IGAD digniin ugu jeedisay dhinacyada isku haya Koonfurta Sudan, iyadoo loo sheegay iney nabadda qaataan hadii kale IGAD tilaabo aan la sheegin qaadi doonto.

Mareeg Media

About A warsame 9751 Articles
Published by A Warsame .He can be reached by news@mareeg.com or Mobile :+447737886245