Muqdisho, Mareeg.com: Guddoomiyaha baarlamaanka Soomaaliya Prof. Maxamed Sheekh Cusmaan (Jawaari) ayaa dhalliilo adag u jeediyay xafiisyada gar-yaqaanka guud iyo kan xisaabiyaha guud ee Qaranka, isagoo ugu baaqay xafiisyadan inay howlahooda kasoo baxaan ayna dastuurka dib u eegaan.
Prof. Jawaari ayaa guddiga maaliyadda ee baarlamaanka inay u yeeraan xafiiska hanti-dhowrka guud, Isagoo xusay in haddii xafiiskan howshiisa muddo bil gudaheed ah lagu hagaajin waayo uu go’aan ka qaadan doono baarlamaanka Soomaaliya.
“Guddiga maaliyadda baarlamaanka waxaan ku wargelinayaa inay u yeeraan xafiiska hanti-dhowrka guud si howshiisa uu si wanaagsan u qabsado, sidoo kalena aysan dhici karin hal shilin inuu waddo qalloocan ku baxo, waxaana ka codsanaynaa guddiga iyo hanti dhowraha guud laga billaabo sannadkan cusub ee 2014-ka inay guntida xirtaan oo hantida shacabka si xooggan loo ilaaliyo, dastuurkan dib loo eego,” ayuu yiri Prof. Jawaari.
Prof. Jawaari ayaa sidoo kale dhaliil kulul ujeediyey xafiiska gar-yaqaanka guud ee Qaranka, wuxuuna xusay inuu curyaaminayo howlaha baarlamaanka, nidaamka oo dhanna ka qaribayo.
Jawaari wuxuu tilmaamay in xafiiska gar-yaqaanka guud ee Qaranka uusan daba-gal ku sameyn sharciyada kazoo baxay Baarlamaanka Soomaaliya “Xafiiska gar-yaqaanka guud ee Qaranku howshiisa ha guto, dastuurkana dib ha u fiiriyo, waayo dastuurku wuxuu qorayaa in markii sharci la ansixiyo oo madaxweynuhu uu saxiixo uu isagu daba-gal ku sameeyo, taasna kama hayno” ayuu yiri Prof. Jawaari.
Labada xafiis ee gudoomiyaha baarlamaanka Soomaaliya dhaliilay ayaan aad shacabku uga warfheyn howlaha ay qabteen intii ay jireen.
Mareeg.com
