Maleeshiyo beeleed la dagaalamay ciidamada Jabuuti ee ku sugan Hiiraan

Mareeg.com: Mid ka mid ah maleeshiyaadka beelaha ku dhaqan gobolka Hiiraan ayaa maanta la dagaallamay ciidamada Hiil Walaal ee dalka Jabuuti, waxaana sidoo kale beeshaasi Beledweyne ka dhigeen debadbax looga horjeedo ciidamada Jabuuti.

Rabshadaha iyo is-rasaaseynta ayaa dhacday kadib markii ciidamada Jabuuti oo AMISOM qeyb ka ah ay saaka u dhaqaaqeen deegaanka Deefow, halkaasoo dhawaanahan ay ku dagaalameen labo maleeshiyo beeleed.

Maleeshiyaad beeleed kazoo jeeda mid ka mid ah labada beelood ayaa ciidamada AMISOM weerar gaadmo ah kula qaaday deegaanka Ceel-gaal, waxaana halkaas ka dhacay iska hor-imaad sababay in ciidamada AMISOM dib ugu laabtaan Baledweyne.

Wararka ayaa sheegaya in dagaalka uu ku dhaawacmay mid ka mid ah maleeshiyo beeleedka, halka dhowr kalana lasoo xiray.

Nabadoon Xaaji Xasan Kulmiye oo ka tirsan waxgaradka Baledweyne ayaa sheegay in dadka ku nool bariga Baledweyne ay qabaan in ciidamada Jabuuti la safteen maleeshiyo beeleedka iyaga kazoo horjeeda.

Dad badan oo kazoo jeeda bariga magaalada Baledweyne ayaa maanta dhigay debadbax ballaaran, waxaana la xiray wadooyin badan, sidoo kale waxaa albaabada loo laabaya gancsiga.

Maamulka gobolka Hiiraan iyo maamulka degmada Baledweyne ayaan weli ka hadlin weerarka lagu qaaday ciidamada AMISOM iyo debadbaxyada dhacay.

Deegaanka Deefow oo dhowr jeer oo hore dagaallo ka dhaceen ayaan weli xal laga gaarin, iyadoo beel ka mid ah Dir iyo Xawaadle ay halkaas ku dagaalamayaan.

Mareeg Media