Maamulka Juba oo soo bandhigay qof ay dileen iyo afar maxaabiis ah

Mareeg.com: Ciidamada maamulka Juba ayaa saaka soo bandhigay qof meyd ah iyo 4 kale oo maxaabiis ah, kuwaasoo ay sheegeen iney ka tirsan yihiin Alshabaab.

Col. Aadan Goojaar oo ka tirsan saraakiisha maamulka Juba oo warbaahinta kula hadlay xerada Luglow oo ku taalla banaanka Kismaayo ayaa sheegay iney xalay weerar ku qaadeen meel ka warheleen iney ku sugnaayeen rag ka tirsan Alshabaab.

Wuxuu sheegay Col. Aadan Goojaar iney Alshabaab ka dileen 6 ruux oo mid ka mid ah soo bandhigeen, sidoo kalana ay maxaabiis ahaan usoo qabteen ilaa 4 kale oo Alshabaab.

“Dagaalkaas jab ayaa ka gaaray Alshabaab, dhimashadoodu waa 6, dhaawacuna waa 11, 4 maxabiis ahna waan soo qabanaya, kuwa dhintay mid ka mid ah gacanta ayaa lagu dhigay” ayuu warbaahinta u sheegay Col. Aadan Goojaar.

Sarkaalkan ayaa dhanka kale sheegay iney Alshabaab ka qabsadeen 3 qori oo ah nuuca AK47 iyo 1 qori oo PKM ah.

Ma jiro war kasoo baxay Alshabaab oo ku saabsan sheegashada saraakiisha maamulka Juba ee ah iney dileen tiro Alshabaab ah, sidoo kalana maxaabiis soo qabteen.

Mareeg Media

About A warsame 9751 Articles
Published by A Warsame .He can be reached by news@mareeg.com or Mobile :+447737886245