Mareeg Media
Somalia

Duqa Muqdisho oo la kulmay Ciidanka Ilaalada Deegaanka Xamar ee Munishiibiyo

Muqdisho, 10 September 2019—Duqa Muqdisho ahna Guddoomiyaha Gobolka Banaadir Mudane Cumar Maxamuud Maxamed (Filish) ayaa kulan la qaatay saraakiisha Ciidanka Ilaalada Deegaanka Xamar (Munishiibiyo), isagoo kula dardaarmay in la dardargeliyo isla-xisaabtanka, si kor loogu qaado adeegyada ay Dawladda Hoose ee Xamar u hayso bulshada Caasimadda.

Guddoomiye Cumar Filish ayaa sheegay in Ciidanka Ilaalada Deegaanka ay yihiin qeyb muhiim ah oo looga fadhiyo shaqadooda inay ka soo dhalaalaan. Isagoo u sheegay in si adag wax looga qabto dadka nadaafadda iyo bilicda caasimadda halaynaya, loona baahan yahay in sharciga lala tiigsado qof oo ku xad-gudubta.

Duqa Muqdisho ayaa tilmaamay in Maamulkiisa ay ka go’an tahay la dagaallanka Musuq maasuqa, cid walba oo ku xadgudubta hantida dadweynaha Soomaaliyeed tallaabo laga qaadi doono.

“Ciidanka Ilaalada Deegaanku waa muraayadii laga fiirinayay Gobolka Banaadir howlihiisa, waxaana la idin kaga fadhiyaa inaad u istaagtaan sidii kor loogu qaadi lahaa adeegyada kala duwan ee la bixiyo, tallaabana uga qaadi lahaydeen cid walba oo nadaafadda iyo bilicda Caasimadda wax u dhimaysa”.

Saraakiisha Ciidanka Ilaalada deegaanka Xamar ayaa Duqa Muqdisho u xaqiijiyey in ay ka soo dhalaali doonaan waajibaadka laga sugayo, waajibaadkoodana gudan doonaan si horumarka Caasimadda loo xoojiyo.

DHAMMAAD

Get real time updates directly on you device, subscribe now.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More

Do NOT follow this link or you will be banned from the site!