Ciidamada dowladda oo la wareegay Guriceel iyo sarakiishii Ahlsuna & Cabdi Waal oo isaga baxay

Mareeg.com: Ciidamada dowladda Soomaaliya ayaa maanta si nabad ah kula wareegay deegaanka Guriceel oo ay horay u joogeen ciidamada maamulka Ahlusuna Waljamaaca.

Ciidamada Maamulka Ahlusunna ayaa gabi ahaanba iskaga baxay  Gurceel, waxaana markaas kadib halkaasi gaaray Mas’uuliyiin ka tirsan Maamulka Gobolka Galgaduud iyo Ciidamada Dowladda Soomaaliya.

Saraakiisha Ahlusunna ee Gurceel iskaga baxay ayaa waxaa kamid ah Macalin Maxamuud iyo Sheikh C/risaaq Al-ashcari iyo sidoo kale Hogaamiye Kooxeedka Cabdi Nuure Siyaad Cabdi Waal.

Wafdiga Dowladda ee Gurceel gaaray ayaa waxaa kamid  Gudoomiyaha Gobolka Galgaduud Xuseen Cali Weheliye Cirfo, Mahad Maxamed Salaad Wasiir Kuxigeenka Wasaaradda Arrimaha Dibadda Soomaaliya, Gen Maxamed Rooble Jimcaale”Goobaale” iyo Odayaal Dhaqameed.

Gudoomiye Kuxigeenka degmada Gurceel, Cali Baashi oo la hadlay warbaahinta gudaha ayaa sheegay in ay  Wadahadal la galayaan Madaxda iyo saraakiisha Ahlusunna ee iskaga baxay Gurceel.

Wararka laga helayo Guriceel ayaa sheegaya in ciidankii ka tirsanaa Ahlusuna ay labo dhinac kala aadeen, waxaana qeyb ka mid ah ay u baxeen dhanka Xeraale,.

Sidoo kale ciidamo kale oo uu watay Cabdi Waal ayaa iyana u baxay deegaanka Geri-Jire oo 60-KM galbeed ka xigta Guriceel, halkaasoo u dhow dhinaca xuduuda Itoobiya.

Jimcihii lasoo dhaafay ayaa ciidamada dowladda laga saaray deegaanka Guriceel, waxaana sidoo kale la weeraray wafdiga ka socday dowladda Soomaaliya.

La wareegidda ciidamada dowladda ee Guriceel ayaa kusoo beegantay xilli qaar ka mid ah odayaasha dhaqanku sheegeen iney labada dhinac dhex dhigeen xabad joojn 3 maalmood ah.

Mareeg Media