Read Time:1 Minute, 33 Second
Mareeg.com: Radio-ga Alshabaab ee Andalus ayaa baahiyey warbixin ka hadleysa ragii fuliyey weerarkii ururkaasi Khamiistii ku qaaday xarrunta AMISOM ku leedahay Muqdisho ee Xalane.
Sida muuqata ragga weerarka fuliyey waxey ku jireen khad Taleefoon oo toos ah, kaasoo looga duubayey waxa ay sameynayeen.
Radio Andalus ayaa tirada ragga weerarka fuliyey ku sheeay 4 nin oo kala ah:-
1- Nuur Idiris, oo ku magac dheeraa (Sahal), wuxuu ahaa Amiirka hogaaminayey kooxda weerarka qaaday, waxaana loo qorsheeyey inuu beegsado xafiiska Taliska AMISOM.
2- Ibrahim Salaad oo loo yaqaanay (Aadam)
3- Muxamed Sheekh loo yaqaanay (Cabdilmajiid)
4- Cumar Saciid oo ku magac dheeraa (Salmaan Almuhajir).
Sida Alshabaab sheegeen, 2 ka mid ah ragaas ayaa loo qorsheeyey iney laayaan saraakiisha ku suganaa hoolka lag cunteeyo, halka kan 3-aadna loo qorsheeyey inuu iyaga difaac u noqdo.
Warbixinta laga sii daayey Radio Andalus ayaa lagu sheegay in qorshuhu ahaa in marka ay laayaan dadka hoolka cuntada joogay ay u jiheystaan kaalinta Shidaalka si loo holciyo.
Raggan ayaa wareysiyo siiyey Radio-ga Alshabaab iyagoo howlgalka ku jira, waxaana waxyaabaha ay sheegeen ka mid ah iney dileen nin ugu yeeray iney soo gaalaan baar goobta ku yaallay.
Sidoo kale, waxey wareysiga ku sheegeen iney bam la dhacen kaalin shidaal oo ay ciidamada AMISOM ku lahaayeen meel ku dhow xafiiska Taliska AMISOM.
Raggaas oo heystay qeyb ka mid ah xerada AMISOM ku dhawaad 20 saacadood ayaa waxaa subaxdii jimcaha soo afjaray ciidamada Nabad Sugidda Soomaaliya, qeybta loo yaqaano Gaashaan.
Ciidamada Gaashaan ayaa subaxdii Jimcaha soo bandhigay meydadka 4 ruux oo ay sheegeen iney ahaayeen ragii xarrunta weeraray, waana tirada Alshabaab sheegeen iney xarruntaas weerareen.
Alshabaab ayaa markii howlgalkaas dhamaaday sheegay iney dileen ilaa 17 ruux oo ka tirsan ciidamada AMISOM iyo dad kale oo reer galbeed ah, hase ahaatee AMISOM ayaa sheegtay in laga dilay 5 askari iyo qof ajnabi ah oo qandaraas kula jiray AMISOM.
Mareeg Media
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %