Akhri: Shirkii aan caadiga aheyn ee Golaha Wasiirada oo loogu digay dadka hubeysan & warbaahinta * Mareeg.com somalia, World News and Opinion.
Mareeg Media
Somalia

Akhri: Shirkii aan caadiga aheyn ee Golaha Wasiirada oo loogu digay dadka hubeysan & warbaahinta

Mareeg.com: Golaha Wasiirada Soomaaliya ayaa manta Muqdisho ku yeeshay shir aan caadi aheyn, kaasoo weliba uu ka qeybgalay madaxweyne Xasan Sheekh Maxamuud.

Dood dheer kaddib ayay Goluhu isku raaceen in guddi loo saaro sharuucda lagu gaari karo hiigsiga 2016-ka, iyagoo baarlamaanka kala shaqeynaya hanaanka dalka lagu gaarsiinayo doorasho xor ah, islamarkaana la sameeyo guddiga madaxa banaan ee doorashooyinka iyo in la abuuro guddiga madaxa banaan ee xuduudaha iyo arrimaha federaalka iyo kuwa kale.

War-murtiyeed ay golaha Wasiirada ka soo saareen shirkii aan caadi ahayn ee ay goluhu ku yeesheen Muqdisho ayaa waxaa saxaafadda u akhriyay Wasiirka Warfaafinta iyo hunuuninta ee Xukuumadda Soomaaliya Mustaf Sheekh Cali Dhuxulow, kuwaasi oo ay ka mid ahaayeen in howlgalladii amniga ee ka dhacay Muqdisho ay ahaayeen kuwa lagu xaqiijinayo guud ahaan amniga caasimadda, islamarkaana aan lagu xad gudbi doonin xaquuqda aas aasiga ah ee dadweynaha.

Sidoo kale war-murtiyeedka aya ku qornaa in sida uu sharciga qabo hay’adaha amniga iyo ciidamada qalabka sida iyo ciddii ruqsad u haysata oo kaliya in ay hub ku dhex wadan karaan magaalada Muqdisho.

Mustaf Dhuxulow ayaa yiri “Waxaa la mamnuucay ka ganacsiga hubka nooc kasta uu yahay, haysashada ciidamada abaabulan oo ka baxsan ciidamada qalabka sida iyo kuwa AMISOM, in waddooyinka lala maro hub aan sharciyaysneyn iyo dadweynaha ay hay’adaha amniga ku soo wargeliyaan cidkasta oo haysatay hub sharci darro ah, ayna ku soo wareejiyaan hubka sharci darrada ah Wasaaradda Amniga Qaranka”

Wasiirka Warfaafinta oo hadalkiisa siiwata ayaa xusay in ciddii ka hortimaada ciidamada amniga marka ay ku guda jiraan howlaha amniga sugidda ee ay u xilsaaranyihiin ay ku xadgudubtay sharciga.

“Warbaahinta madaxa banaan waxaa lagu wargelinayaa in ay dhowraan sharciga oo aysan marnaba ku xadgudbin, waxaa saxaafadda iyo war baahinta lagu adkeynayaan inaysan ku kicin falal ku saabsan iska horkeenta bulshada, kicinta colaadaha, been abuurka aan sal lahayn, iyadoo Warbaahintii ku dhaqanka arrimahan sare ku xusan waxaa la horkeenaya Maxkamadaha garsoorka ee awoodda u leh qaadidda dacwadooda” ayaa lagu yiri bayaanka ay goluhu ka soo saareen shirkoodii maanta ee uu Saxaafadda u akhriyay Wasiirka Warfaafinta.

War-murtiyeedka kazoo baxay Golaha Wasiirrada oo buuxa ayaa u qornaa sidan:

Ref: XRW/OM/PR 0465/08/14 August, 16 , 2014

Golaha Wasiirada oo maanta soo saaray war-murtiyeed ku aadan arrimaha amniga

Muqdisho, 16, August, 2014… Golaha Wasiirada Xukuumadda Federaalka Soomaaliya ayaa maanta isugu yimid shir aan caadi ahayn oo shir gudoominayey Ra’iiusl Wasaaraha Xukuumadda Federaalka Soomaaliya Cabdiwali Sheikh Axmed, waxaa sidoo kale kulanka ka soo qayb galay Madaxweynaha Jamhuuriyadda Federaalka Soomaaliya Xasan Sheikh Maxamud.

Kulanka oo looga hadlayey ariimaha amniga iyo xaaladihii ugu danbeeyey dalka ayaa waxaa laga soo saaray warmurtiyadeed ku aadan sida loo wajahayo nabad ku soo dabaalida dalka.

WAR-MURTIYEED

Xukuumadda JFS waxay u gubinaysaa ummadda Soomaaliyeed fariin ku aadan amniga dalka iyo hawl-galada lagu sugayo amniga guud:

1. Ummadda Soomaaliyeed waxaa lagu wargelinayaa in hawl-galadii amniga ee ka dhacay magaaladda Muqdisho maalmihii la soo dhaafay ay ahaayeen kuwo lagu xaqiijinayo amaanka guud ee dadweynaha iyo dalka, ee aan marnaba loola jeedin cid gaar ah, shakhsi gaar ah ama degaan gaar ah. Waxayna Xukuumaddu ka xun tahay wixii waxyeelo ah ee soo gaaray dad shacab ah ee ku sugnaa goobaha ay ka socdeen hawl-galada amaanka lagu sugayey oo aan ku-talo-gal ahayn, waxaana dowaldu ka tacsiyeeynaysaa dadkii dhibaatadu ka soo gaartay howlgaladaas:

2. Xukuumadda JFS waxay amaanaysaa soona dhaweynaysaa Hay’adaha Amniga Qaranka hawl-galadii ay fuliyeen iyagoo sugaya amniga dadweynaha;

3. Waxaa xusid mudan, in hawl-galada lagu sugayo amniga ummadda la sii wadi doono, iyadoo marnaba aan lagu xad-gudbaynin xuquuqda asaasiga ah ee dadweynaha;

4. Sida sharcigu qabo, Hay’adaha Amniga iyo Ciidamada Qalabka-sida ama ciddii ruqsad loo siiyo oo keliya ayaa xaq u leh haysasho hub;

5. Waxaa la mamnuucay:

1. b) ka-ganacsiga hubka nooc kasta uu yahay;

2. t) haysashada ciidan abaabulan oo ka baxsan ciidamada qalab-sida iyo AMISOM;

3. j) in wadooyinka lala maro hub aan sharciyeysnayn;

6. Waxaa lagu wargelinayaa dhammaan dadweynaha Soomaaliyeed in ciddii haysata hub sharci daro ah ay ku soo wareejiso gacanta Hay’adda Amniga (Wasaaradda Amniga Qaranka) ama ay si sharciga waafaqsan uga diiwaan-geliso Hay’adaha Amniga Qaranka;

7. Ciddii ka hortimaada ciidamada amniga, marka ay ku jiraan hawlaha amni-sugid ee ay u xilsaaran yihiin, waxay ku xad-gudubtay sharciga dalka, waxaa lala tiigsanayaa sharaciga dalka u yaala;

8. Xukuumadda JFS waxay ku adkaynaysaa Hay’adaha Amniga in ay markasta dhawraan Xuquuqda Aadanaha, sarreynta iyo talinta sharciga (respect to the supremacy of law and the rule of law);

9. Warbaahinta madaxa-bannaan waxaa lagu wargelinayaa in ay dhawraan sharciga oo aysan marnaba ku xad-gudbin. Waxaa Saxaafadda iyo Warbaahinta lagu adkaynayaa in aysan ku kicin falal iyo warbaahin iska-horkeenka bulshadda, kicinta colaadaha, been-abuurka aan salka lahayn, iwm. Waxayna xasuusinaysaa in falalkaas ay yihiin danbiyo cad cad. Warbaahintii ku dhaqanta arrimaha xad-gudubka ah ee sare ku xusan, waxaa laga qaadayaa talaabo sharciga waafaqsan;

10. Xukuumadda JFS waxay markasta dhawraysaa gacan-sarreynta sharciga, talinta sharciga iyo ilaalinta xuquuqda asaasiga ah ee dadweynaha Soomaaliyeed, waxayna xushmaynta xoriyadda saxaafadda;

11. Golohu wuxuu u xilsaaray Wasaaradda Warfaafinta iyo Wasaaradda Amniga Qaranka in ay sida ugu dhaqsaha badan u soo saaraan siyaasad cad oo qeexaysa qorshe lagu tayeeynayo laguna xirfadaynayo warbaahinta madaxa banana;

12. Xukuumadda JFS waxay dadweynaha Soomaaliyeed ku wargelinaysaa in la abuuray khad (telefoon) gaar ah oo ciddii qabta tabasho, wargelin iyo talo-bixin ay kala soo xiriiri karto Hay’adaha Amniga (Wasaaradda Amniga Qaranka), waxaana dhawaan khadkaas lagu soo bandhigi doonaa Warbaahinta Qaranka; iyo

13. Xukuumadda JFS waxay markale shacabka Soomaaliyeed u ballan-qaadaysaa in ay xoojinayso amniga si waafaqsan shuruucda dalka si muwaadinku u helo xasilooni iyo amaan;

DHAMAAD

Get real time updates directly on you device, subscribe now.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More

Do NOT follow this link or you will be banned from the site!