Munaasabad lagu maamuusayay 38-guuradii ka soo wareegatay
Maalintii Ciidanka Asluubta Soomaaliyeed la aas aasay ayaa
manta lagu dhigay Xabsiga Magaalada Muqdisho.
Munaasabadan oo aheyd mid si weyn loo soo agaasimay ayaa
waxaa ka soo qeyb galay Mas'uuliyiin ka socotay Dowladda
Federaalka, Saraakiisha Ciidamada Dowladda, Maamulka
Gobolka Banaadir iyo marti sharaf aad u badan.
Gen. C/llaahi Macalin Cali oo ah Taliyaha Ciidanka
Asluubta Soomaaliyeed ayaa ugu horeyn ka warbixiyay wax
qabadka Ciidanka Asluubta Soomaaliyeed, isagoona sheegay
in Ciidanka asluubta si rasmi ah ay ugu biireen Ciidamada
qalabka sida sanadkii 1970-kii, xilligaasoo uu sheegay in
aheyd markii dhidiba loo aasay.
Genanka ayaa sheegay in Ciidanka Asluubta ay qabtaan howlo
badan oo isugu jira difaaca qaranka, ilaalinta xabsiyada
iyo xanaaneynta caruurta agoonta ah.
Waxa uu kaloo sheegay in Ciidanka Asluubta ay si toos ah
ugu xiran yihiin Wasaarada Arrimaha Gudaha, Gaashaandhiga,
Wasaarada Haweenka iyo Horumarinta Qoyska iyo qeybaha kale
ee Ciidanka Dowladda.
Gen. C/llaahi ayaa waxa uu kaloo tilmaamay in 58 Xabsi ay
maamusho Taliska Ciidanka Asluubta kuwaasoo u kala baxa
Xabsiga Dhexe, Xabsi gaar ah, xabsi furan, Xabsi Gobol,
Degmo iyo Xarumaha agoonta, kuwaasi oo uu sheegay in 20 ka
mid ah ay ku yaalaan Deegaanada Puntland halka 38 kalena
ay ku yaalaan Deegaanada Koonfurta.
Sidoo kale waxaa munaasabada ka hadashay Wasiirada
Haweenka iyo horumarinta Qoyska Marwo Khadiijo Maxamed
Diiriye sheegtay in maalinta Ciidanka Asluubta ay tahay
maalin xusid mudan, waxayna cadeysay in Ciidanka Asluubta
iyo Wasaaradeyda ay yihiin kuwo isla shaqeynaya, iyagoo
tababaraya Gabdhaha agoonta iyo wiilsha ee ku jira Xeryaha
Ciidanka Asluubta.
Ugu dambeyn waxaa Xaflad ka hadlay Ra'iisul wasaare
Kuxigeenka 1aad ahna Wasiirka Cadaalada iyo Diinta Prof.
saalim Caliyow Ibrow oo daboolka ka qaaday in Dowladda
Federaalka ay ahmiyad ballaaran siineyso Ciidamada Qaranka.
Prof. Ibrow ayaa sheegay isagoo ku hadlayo Magaca
Madaxweynaha iyo Kan Xukuumada uu maanta hambalyo u dirayo
dhamaan Ciidamada Asluubta Soomaaliyeed, wuxuuna ku
amaanay dadaalka dheeraadka ah oo ay u galeen ilaalinta
Xabsiyada iyo xerooyinka ay ku hayaan agoonta soomaaliyeed.
Xaflada maalinta Ciidanka Asluubta Soomaaliyeed ayaa waxaa
lagu soo bandhigay riwaayad ka turjumeysay waxqabadka
Ciidanka Asluubta, taasoo ay soo bandhigeen Hobalada Onkod
oo ka tirsan Ciidanka Asluubta Soomaaliyeed.
Cabdi Casiis Golf
Xafiiska Wararka Mareeg ee Moqdisho
